Episod 7 - Pies

Et denkt een net ëmmer un se ma sinn se aus der Englescher Kichen net ewech ze denken - Genau et geet em déi faméis Pies!

Fish Pie

Fir dem Anne seng meeschten Englesch Frënn ass dës Fëschpaschtéit eng Erënner un déi gutt al Schoulzäiten, wou dëse Plat quasi zu de Grondnahrungsmëttele gehéiert huet.

D’Anne huet dësen typesche Plat liicht ëmgeännert a mat engem Schotz wäisse Wäin an Estragon verfeinert. Dëse gebakene Plat ass einfach ze maachen an ideal fir an der Woch ze iessen.

Et muss och net iergend e gereeschter Fësch sinn, all d’Zort vu Fësch passt dobäi a wann Dir wëllt kënnt Dir och Crevetten dobäi maachen.

Fir 6-8 Leit – Preparatioun 45 Minutten – Uewen 30 Minutten – e bëssen Aarbecht

Fir de Purée:
1kg Gromperen
50g Botter
100ml Mëllech
2 Kaffisläffele Rahm

Fir d’Fëllung
2 Poretten (300g)
1 Schallott oder eng kleng Ënn
1 Knuewelekszéif
50g Botter
3 Kaffisläffele Miel
400ml Mëllech
150ml wäisse Wäin
100g agefrueren Ierzen
2 Gräpp frëschen Estragon
300g Haddock (Aiglefin) (gereeschert)
300g Saumon
100g gerapptene Kéiss (Cheddar oder Gruyère)

1 Zitroun

Preparatioun:

D’Grompere schielen an a Wierfele schneiden, a kachendem Waasser ofkachen bis se duerch sinn. Ofschëdden, de Botter, d’Mëllech an d’Rahm dobäi ginn an dat ganzt püréieren bis et eng homogen Mass ass. Mat Salz a Peffer asaisonnéieren, Frischhaltefolie driwwer maachen an op d’Säit stellen.

D’Porette wäschen an a kleng Réngelcher schneiden. D’Schallott oder d’Ënn an de Knuewelek kleng schneiden. De Botter an d’Pan ginn an d’Porette mat der Schallott a mam Knuewelek brode bis se mëll sinn.

D’Miel dobäi ginn an fir eng weider Minutte kachen, d’Halschent vun der Mëllech draschëdden an mëttlerer Hëtzt kach loossen. Soubal wéi d’Mëllech méi déck gëtt, kënnt Dir de Rescht vun der Mëllech an de Wäin dobäi ginn. Dat Ganzt opkache loossen dann vun der Kachplaque huelen, salzen a pefferen, d’Iertzen an den Estragon dramaachen.
Den Uewen op 200°C Umluft virhëtzen.

De Fësch a kleng Stécker schneiden an an eng feierfest Schossel ginn. D’Porettesauce driwwerschëdden a mam Fësch gutt vermëschen. De gerapptene Kéiss driwwer maachen a mam Purée iwwerdecken.

E bësse Botter schmëlzen an dat Iewescht vum Plat mam Pinsel areiwen.

Fir 30 Minutten am Schäffche goe loossen, a mat Zitroun an enger Zalot zervéieren.

Steak and Ale Pie

Wann Dir d’Anne frot dann ass dës Paschtéit, d’Mamm vun alle Paschtéiten. Säfteg Stécker vum Rand an dat an enger herzhafter Béiersauce, mat enger lëfteger Croute driwwer! E Genoss! Et hëllt e bëssen Zäit fir dëse Plat ze maachen dofir preparéiert d’Anne dëse Iessen nëmmen um Week-End.

Fir 6 Portiounen– Preparatioun 30 Minutten – Kachen 1 ½ - 2 Stonnen – Uewen 30 Minutten – zäitopwendeg

5 Zoppeläffele Sonneblummenueleg
200g gereescherte Speck (Julienne de lardons)
2 geschnidden Ënn
2 zerdréckten Knuewelekszéiwen
850g Brot
500ml Béier
500ml Bouillon de Boeuf
1 Zoppeläffel Tomatepurée
1 Zoppeläffel Balsamico
2 Lorberblieder
4 Straiss Thymian
250g geschielten, geschnidde Muerten
2 tbsp Mais Miel
250g Champignonen
500g fäerdeg gerulltene Bliederdeeg
1 Eegiel

Preparatioun:

An enger Casserole, 1 Zoppeläffel Ueleg hëtzen. De Speck an d’Ënnen draginn a während 5 Minutte goe loossen bis d’Ënnen duersichteg sinn. De Knuewelek dobäi ginn a fir eng aner Minutt goe loossen. Duern alles eraushuelen an an eng separat Schossel ginn.

Während dem gëtt d’Fleesch a Cube vun ongeféier 2,5 Zentimeter geschnidden, gesalzt a gepeffert. An enger Pan 2 Zoppeläffelen Ueleg hëtzen an d’Fleesch gutt dran ubroden.

Wann d’Fleesch bis ugebroden ass, kënnt de Speck mat den Ënnen dobäi. De Béier dobäischëdden. Opkache loossen bis datt de Fong vun der Pan sech opgeléist huet. De Bouillon, den Tomatepurée, de Balsamico, de Lorber, den Thymian an d’Muerten draginn. Opkache loossen an duerno en Deckel dropmaachen a während 1 ½ bis 2 Stonne goe loossen, soulaang bis d’Fleesch duerch ass. De Lorber an den Thymian eraushuelen.

Den Uewen op 180°C Umluft virhëtzen.

D’Maismiel zesumme mat 4 Zoppeläffelen Sauce vermëschen a bei de d’Fleesch ginn a fir 5 weider Minutte kache loossen bis d’Sauce gedéckst ass. Salzen a pefferen an ofkille loossen fir d’Champignonen ze preparéieren.

D’Champignonen wäschen an a Véierels schneiden. An enger Pan, 2 Zoppeläffelen Ueleg hëtzen an d’Champignonen während 5 Minutten dra broden, salzen a bei d’Fleesch ginn.

D’Fleesch an eng feierfest Schossel ginn an de Bliederdeeg driwwerleeën. De Rescht Deeg ewechschneiden a kleng Sträifen drausmaachen. Den Deeg mat Ee bepinselen, d’Sträifen driwwerleeën, déi dann och mat Eegiel bepinselt ginn. Den Deeg aschneiden fir datt den Damp während dem Baken eraus kann.

Dat Ganzt 30 Minutten am Schäffche goe loossen bis datt den Deeg opgaange ass a schéi gëlle brong ass. Dobäi eng gréng Zalot zerwéieren an e gudden Béier dobäi drénken.

TIP: A Plaz mat Bliederdeeg en Deckel ze maachen, kann een och d’Fleesch als Ragout iessen. Am beschten schmaacht dobäi e gudde Gromperepurée.

Rustic Apple Pie

Et gëtt eigentlech näischt wat besser bei den Hierscht passt wéi e gudden Äppelkuch. – Äppel déi mat Kanéil gewierzt sinn an an engem traditionellem Deeg agepak, alles dat nach begleet vun enger gudder Portioun Vanillscrème.

30 Minutte Preparatiou – 30 Minutte raschte loossen – 50 Minutte baken - Fir 6 Portiounen – e bëssen Aarbecht

Fir den Deeg:
100g Pudderzocker
50g gemuelte Mandelen
150g kale Botter
½ Kaffisläffel Vanill
1 Ee
225g Miel

Fir d’Fëllung:
5 Äppel, Cox oder Granny Smith (ongeféier 500g)
1 gréng Zitroun
90g brongen Zocker
1 Kaffisläffel Kanéil
¼ Kaffisläffel gemuelte Gingembre
2 Zoppeläffelen Miel
1 geschloent Eegiel
1 Zoppeläffel Zocker

Preparatioun:

De Pudderzocker an d’Mandelen an eng Schossel ginn. De Botter a kleng Stécker schneiden a bei de Pudderzocker an d’Mandele ginn. Mam Knieder vun Ärem Mixer sou laang schloen bis de Botter a Stécker zerfält. D’Vanill an d’Ee dobäi ginn, weider mam Mixer mëschen bis datt en Deeg entsteet. Den Deeg zesumme maachen, datt e wéi e Ball ausgesäit, a eng Frischhaltefolie awéckelen a fir eng Stonn an de Frigo stellen.

Soubal den Deeg kal ass, muss den Uewen op Umluft op 160°C erhëtzt ginn. D’Äppel schielen, a Stécker schneiden an all Stéck nach eng kéier halbéieren. D’Äppelstécker hunn herno ongeféier d’Gréisst vun 3 Centimeter. Déi geschnidden Äppel an eng Schossel maachen, de Jus vun der ausgepresstener grénger Zitroun driwwerschëdden, den Zocker, de Kanéil, de Gingembre, d’Miel dobäi ginn an d’Schossel op d’Säit stellen.

Den Deeg an zwee schneiden – deen een Deel e bësse méi grouss wéi den Aneren. Dat méi grousst Stéck op enger mat Miel ageriwwener Surface rullen. De gerulltenen Deeg dann an eng Taarteform déi 23 cm Duerchmiesser huet leeën. D’Äppelstécker op den Deeg leeën. Dat zweet Stéck Deeg ausrullen an iwwer d’Äppel maachen. D’Ecker bäidrécken an den iwwerflëssegen Deeg mat engem Knäipche ewech schneiden. Den Deckel vun der Taart 3 mol liicht aschneiden fir datt den Damp erauskënnt während se am Schäffchen ass.

Wann Dir wëllt, da kënnt Dir mam Rescht vum Deeg kleng Sträife schneiden déi Dir dann op d’Taart leeë kënnt. Déi ganz “Pie” da mat Eegiel bepinselen a bëssen Zocker nach driwwermaachen a fir 50 Minutten an den Uewe ginn.