Saison 2: Episod 1 - Barcelona

D'Anne ass an dësem Episode zu Barcelona a stellt Iech säi Choix u spuenesche Spezialitéite fir.

Mini Tortillas



Hutt Dir e Picknick geplangt? Dann zaubert Iech dach nach séier e puer Mini Tortillas. Si sinn einfach ze maachen a schmaachen einfach herrlech, wann een op der Wiss sëtzt an d’Sonn engem an d’Gesiicht schéint. D’Mini Tortillas passen och gutt als Party-Fingerfood. Wichteg ass, datt Dir d’Muffinformen gutt mat Ham als Kierwchen fir d’Tortillas ausleet. D’Mass géif soss an der Form pechen.

Preparatioun: 35 Minutten - Fir 14 Stéck - Einfach

1 EL Olivenueleg + e bësse fir anzefetten
1 Zwiwwel
100 g ageluechten Artichaut
60 g gegrillten ageluechten roude Paprika
7 Scheiwen Serranoham
6 Eeër
100 ml Ram
60 g Parmesan, geriwwen
Salz a Peffer

Den Uewen op 160°C Omloft hëtzen. D’Zwiwwel schielen, an der Mëtt duerchschneiden an a fein Scheiwe schneiden. Den Ueleg an enger Pan hëtzen, d’Zwiwwelen 10 Minutte laang dënsten bis se duerchsiichteg sinn. Op d’Säit stellen.

D’Artichauten an de Paprika op e Kichepabeier leeën, fir datt d’Fett absorbéiert gëtt. Duerno a mondgerecht Stécker schneiden. D’Ham rechteckeg schneiden. D’Muffinformen mat Olivenueleg afetten. De Buedem an d’Säite gutt mat Ham ausleeën. D’Zwiwwel, d’Artichauten an de de Paprika op déi 14 Forme verdeelen.

D’Eeër, d’Ram an de Parmesan an enger Schossel mëschen a mat Salz a Peffer wierzen.

D’Eeërmass an d’Forme maachen an 18 Minutten am Uewe baken. D’Tortillas 5 Minutten an de Formen loossen fir ofzekillen. Uschléissend mat engem Läffel eraushuelen an direkt zerwéieren oder fir ofzekillen op e Kichegrill leeën.

Patatas bravas

Knausereg Gromperewierfleen mat enger scharfer Tomatensauce – wou kann een do nach widderstoen. Patatas bravas sinn an all Tapasthéik ze fannen a kann ee relax och am Stoe genéissen. Déi réih Gromperewierfele ginn normalerweis an Olivenueleg fritéiert, bis se bausse knausereg sinn a banne mëll sinn. D’Anne baakt seng Patatas am Schäffchen an dat während dem et seng Tomatensauce preparéiert.  

Preparatioun: 1 Stonn –– Fir 6 Tapas – Einfach

750 g Gromperen
6 EL Olivenueleg

Fir d’Sauce:
1 Zwiwwel
2 EL Olivenueleg
2 Knuewelekszéiwen
3 EL dréchene Sherry
400 g gehakten Dousentomaten
1 TL Chiliflocken
1 TL Paprikapolver
2 TL Wäinessig
1 TL Zocker
1/2 TL Salz

Den Uewen op 200°C Umloft virhëtzen. D’Grompere schielen an an 2 cm grouss Wierfele scheiden. E Bakblech mat 4 EL Olivenueleg afetten an am Uewe 5 Minutten hëtzen. Aus dem Uewen eraushuelen, d’Gromperen drop verdeeln a salzen. 45 Minutte baken, bis d’Gromperen gëlle brong an knausereg sinn. Dobäi all 10 Minutten dréinen. No ca 20 Minutten d’Gromperen mat den 2 EL Olivenueleg besprinselen an dréinen.

Während d’Grompere baken, d’Sauce zoubereeden. D’Zwiwwelen schielen, kleng schneiden an an engem Dëppen mat 1 EL Olivenueleg 5 Minutten dënsten.

De Sherry dobäiginn a soubal et licht kacht, d’Tomaten, d’Chilliflocken, de Paprikapolver, den Esseg, den Zocker an d’Salz dramaachen. Opkache loossen dann de Gas reduzéieren an 10 Minutte kache loossen, bis d’Sauce gedéckst ass.

D’Sauche vun der Plaque erofhuelen am mam Mixer püréieren. D’Patatas Bravas mat der Tomatensauce zervéieren.

Black Pudding Croquetas

Et gëtt näischt Besseres wéi wann een an eng frësch frittéiert “Croqueta” bäisse kann. Knausereg, e bësse papeg a salzeg, et ass all Kéier e Genoss. D’Spuenesch Croquetas si gewéinlech mat Béchamel Sauce a gi gefëllt mat Kéis, Ham oder gereechertem Fësch. D’Anne huet sech awer dofir entscheet fir de Corquetas e Lëtzebuergeschen Touch ze verpassen: mat Träipen. Wéinst der Konsistenz vun den Träipen, loossen déi sech och ganz gutt mat der Béchamel vermëschen.
Preparatioun : 45 Minutten – Ofkillen: 2h-iwwernuecht, Kachen/Fritéieren: 30 Minutten – Fir 16 Stéck – E bësse komplizéiert

2 Lëtzebuergesch Träipen
1 kleng Poretten
2 Zoppeläffelen Olivenueleg
80g Botter (net gesalzt)
80g Miel
500ml waarm Mëllech
3 Zoppeläffelen gerapptene Péiterséileg
e bësse Muskatnoss
Salz a Peffer
4 Eër
180g Panéiermiel
Olivenueleg fir ze fritéieren

Fir den Aioli:
1 Eegiel
1 Kaffisläffel Moschter
50ml Olivenueleg
50ml Sonneblummenueleg
1-2 Knuewelekszéiwen
1 ½ Kaffisläffel Zitrounejus
Salz a Peffer

E liichten Aschnëtt an d’Träipe maache fir d’Haut erofzehuelen. Dann kleng Stécker schneiden, an eng Schossel maachen a graff mat enger Forschette mëschen.

D’Porette botzen a kleng reng Stécke schneiden.

Den Olivenueleg an de Botter an eng grouss Pan maachen. D’Porette fir 2 Minutten ubroden, bis se ufänke bësse méi mëll ze ginn, d’Träipen dobäi maachen a fir weider 2 Minutte brode loossen.

D’Temperatur e bëssen erofsetzen an d’Miel drënner réieren. Fir weider 2 Minutte goe loossen. Regelméisseg réieren.

Lues a lues déi waarm Mëllech drënner réieren, gutt klappen bis een e liichten Deeg kritt. Weider 2 Minutten goe loossen, regelméisseg réieren.

De Gas ausmaachen a mat der Muskatnoss, Salz a Peffer wierzen. De Péiterséileg drënner ginn an an eng Bakforme ginn (24 cm x 18 cm). 5 Minutten ofkille loossen, da mat enger Frischhaltefolie zoudecken fir datt sech keng Haut bild. Uschléissen an de Frigo fir mindestens 2 Stonne stellen . Am beschten wier et iwwert d’Nuecht ofkille loossen.

Während dem, gëtt den Ailoi preparéiert. D’Eegiel an de Moschter ginn an eng Schossel gemat a mam Mixer gemëscht. Lues a lues den Olivenueleg dobäi ginn. Duerno de Sonneblummenueleg och lues a lues bäiginn.

De Knuewelek schielen an zerdrécken, den Zitrounejus dobäi ginn. Mat Salz a Peffer wierzen, mat enger Frischhaltefolie zoudecken an an de Frigo stelle bis et gebraucht gëtt.

D’Eeër an eng Schossel ginn a klappen. D’Panéiermier an eng aner Schossel maachen. Déi ofgekillte Béchamel a 16 kleng Rechtecker schneiden (ongeféier 3 cm héich a 6 cm breet)

All Béchamel-Stéck an déi geklappten Eeër zappen an duerno am Panéiermiel rulle bis se ganz bedeckt sinn. Dann nees eng Kéier an d’Eeër an an d’Panéiermiel zappen.

Den Olivenueleg an eng Pan ginn. Ophëtze bis an d’Croquetas dra fritéieren. D’Corquetas solle 5 Minutte goen a regelméisseg gedréint ginn, bis de se schéi gëllen op all Säit sinn.

Direkt zervéieren an den Aioli dozou reechen.