LU FR Eng Serie aus dem Liewe gegraff an op de Mënsch zougeschnidden. All Episod begleet eng Persoun a sengem gelieften Alldag.

Dës Staffel ass och am HD ze kréien

Chaque documentaire est disponible en version française sous-titrée

routwäissgro: Episode 19“//@hack.lu”

Réalisatioun: Tom Alesch

Episod : “@//hack.lu” (10.12.2017)
Net all Computerhacker maache béis Saachen. Et ginn esouguer richteg feiner!

Op den éischte Bléck mengt een, et hätt een et mat enger chaotescher Clique vu jonke Leit ze dinn, deenen hier eenzeg Suerge Videospiller an déifgefruere Pizzae sinn. Mee den Dennis a seng Kollege vum Chaos Computer Club Lëtzebuerg gesinn sech als modern Ritter vun de Biten a Byten. Si hëllefen am Repair-Café wann de Printer klemmt, beroden d'Leit wa se Google a Microsoft äddi soe wëllen, a kämpfe fir eng besser Welt, an däer net alles wat mer op Internet maachen dozou féiert, dass een eis seet wat mer kafen a wie mer wiele sollen. Bei all dem bleiwen den Dennis, de Jan an all hier Frënn ëmmer mat zwee Féiss um Buedem.

Iwwert den Tom Alesch

Den Tom Alesch koum iwwert d’Mataarbecht beim Radio a bei der Televisioun bei den Dokumentarfilm. Heen huet sech mat zäitgeschichtlechen Theme vum 20. Joerhonnert befaasst, zum Beispill mat dem obligatoresche Militärdéngscht zu Lëtzebuerg an „Ons Arméi“ (zesumme mam Cathy Richard) oder mat der lokaler Schiferindustrie a „bloe Steen“. Donieft huet heen och Kënschtlerportraite realiséiert, ënnert anerem vum Moler Roger Bertemes, dem Filmpionnéier Philippe Schneider an zulescht, zesumme mam Anne Schiltz, vum Schrëftsteller Roger Manderscheid.