De Kloertext elo am ReplayBurnout - Ausgebrannt op der Aarbecht!

Wat ass dee Burnout genee, wéi kann e geheelt a vill méi wichteg nach, wéi kann e verhënnert ginn?

Kloertext: Burnout - Ausgebrannt op der Aarbecht! (28.03.2018)
Wat ass dee Burnout genee, wéi kann e geheelt a vill méi wichteg nach, wéi kann e verhënnert ginn?

De Klortext elo ëmmer mëttwochs um 20 Auer. D'Emissioun vum Caroline Mart ronderëm déi Themen, déi jiddereen am Alldag betreffen.

Wat schaffs du? Dacks eng vun den éischte Froen, wann ee sech kenneléiert. Den eegenen Job definéiert een zum groussen Deel als Persoun. Mä déi Aarbecht, déi ons Identitéit matausmécht, kann ons och krank maachen, séileg a kierperlech, wann ee sou laang am roude Beräich schafft, bis et stënterlech net méi geet: een ausbrennt!

Iwwerschätzte Moudediagnos fir déi eng, bedenklecht Symptom vun enger Leeschtungsgesellschaft, wou d’Mënschen zu all Präis funktionéiere sollen, fir déi aner: Wat ass de Burnout genee, wéi kann e geheelt a vill méi wichteg nach wéi kann e verhënnert ginn?

Doriwwer hu mir mat dësen INVITÉË geschwat:

Dr Jean-Marc Cloos
Psychiater, Sucht-Therapeut
Medezineschen Direkter Psychiatrie HRS



Max Jacoby
Aarbechtsmedeziner
President ALSAT 



Nora Back
Aarbechtspsychologin
OGBL / Gesondheet , Soziales + Erzéiung



Nico Bellion
Hat e Burnout
Gëtt elo Coach



Burnout: Temoignage vu Betraffenen (29.03.2018)
An engem längere Reportage weise mer iech en Temoignage vu Betraffene vu Burn-Out. Dacks ass d'Ursaach op der Aarbecht vun de Leit ze fannen.


De Resumé vum Background vum Caroline Mart
"An op eemol sinn ech an eng Mauer gerannt", esou beschreiwe Mënschen, déi e Burnout haten, dee Moment, wou si d'Belaaschtung net méi gepackt hunn an de ganze Stress, dee se iwwer Méint a Joren erlieft hunn, zum Zesummebroch gefouert huet.

Wann Aarbecht krank mécht ...

Am Kloertext erzielen zwee Betraffen hir Geschicht an engem laange Reportage, e Prozess, dee schläichend geet, wou ee schafft, ëmmer méi schafft a laang selwer net mierkt, dass et u sech scho vill ze vill ass, bis dee Moment, wou och de Kierper streikt, an dat geschitt stënterlech, ganz brutal geet et dann an déi berühmte Mauer. Zu Wuert kommen awer och Psychologen, Psychiateren an Dokteren, de Gros vun hinne Spezialisten aus dem Gesondheetszentrum vun der Zitha, wou en extra Programm fir Burnout-Patienten ugebuede gëtt.

Wéi erkennt een d'Kränkt, wéi heelt ee se a wéi kann ee verhënneren, dass se optrëtt?

Dat sinn och déi zentral Froen an der uschléissender Diskussiounsronn nom Reportage, mam medezineschen Direkter vun der Psychiatrie an den Hôpitaux Robert Schuman, Jean-Marc Cloos, dem Aarbechtsmedeziner Dr Marc Jacoby, der Nora Back vum OGBL an dem Nico Bellion, dee selwer e Burnout hat.

D'Bewosstsinn ass méi grouss gi fir psychesch Kränkten, mä nach ass et deels en Tabu an onser Gesellschaft, gëtt et als Schwächt ugesinn. Och den Nico Bellion hat gezéckt, sech virun eng Kamera ze setzen an oppen ze temoignéieren, huet dat awer och gemaach, fir all deenen, déi selwer elo am Burnout sinn, ze weisen, dass et ee Wee eraus gëtt, hie selwer huet säi Liewe staark verännert a mécht elo eng Ausbildung als Coach.

All zweete Krankheetsdag wéinst psychesche Problemer

An de Burnout erarëtschen, deet ee just deels, well een ze vill e Perfektionist ass oder net Nee soe kann, et läit net just un der Perséinlechkeet vum Betraffenen - och wann déi schonn eng Roll spillt -, mä et muss een dat och am Kontext vun onser Gesellschaft an hire Wäerter gesinn, gouf an der Ronn betount: Esou laang Leeschtung a Profit, deen héije Stellewäert hunn an d'Mënschen ëmmer méi flexibel a permanent erreechbar musse sinn, gëtt de Problem ëmmer méi grouss.

Oft ass et net d'Aarbecht u sech, mä et sinn d'Ëmstänn, déi d'Ursaach sinn: Net genuch Unerkennung, en Job, wou ee wéineg selwer matdecidéiere kann, schwiereg Aarbechtszäiten, ëmmer méi och nach sënnlos Beschäftegungen, wou ee Paperassen ausfëllen a sech justifiéiere muss, an alles dat zesumme kann dann derzou féieren, dass d'Aarbecht krank mécht.

Statistike gëtt et zwar keng hei am Land an de Burnout ass och net als Beruffskränkt unerkannt, mä EU-Statistiken no geet een dervunner aus, dass all zweete Krankheetsdag op der Schaff ewell op de Kont vu psychesche Problemer geet.

Am Intressi vun de Firmaen!

Entreprisë misste sech och bewosst sinn, dass et och an hirem finanziellen Intressi ass, fir en Aarbechtsklima ze schafen, wou et hire Mataarbechter gutt geet: Wann déi motivéiert sinn, da si se och méi produktiv; wann et hinne schlecht geet, gi se fort oder gi krank, a béides kascht.

Et ass deemno net just eng Fro vu Mënschlechkeet, mä och reng eng Fro vu guddem Finanzmanagement. Just Manager léieren oft an hirer Formatioun net, wéi ee mat Leit ëmgeet a vill Burnoute ginn och op eng schlecht Betribsféierung zréck, wou Mataarbechter reng als Ressource gesi ginn, awer net als Mënschen.

Bis zu engem gewësse Mooss kann een dat léieren, gouf och nach am Kloertext gesot, mä et ginn och toxesch Cheffen, déi et ni léieren, do ass et dann d'Responsabilitéit vum Betrib, dat ze mierken an och net jidderengem, deen Expert a senger Matière ass, d'Verantwortung iwwer Mënschen ze ginn.

Wat kann ee präventiv maachen?

Präventiv ka jiddwer Eenzelnen oppassen, fir sech genuch Zäit ze huele fir Pausen, fir no Feierowend oder an der Vakanz ofzeschalten, fir der Aarbecht net op eemol méi Plaz wéi dem Liewen ze ginn.

Alarmzeeche sinn och eng Verännerung vum Verhalen, eng méi staark Reizbarkeet. Ideal wier, wann ee bei sech selwer, mä och bei Famill an Aarbechtskollegen oppasst, wann éischt Unzeechen optrieden, an engem, deen ze vill mécht, hëllefen, Stopp ze soen - ir et ze spéit ass, ir en ausbrennt, esou d'Conclusioun am Kloertext.

FOTOGALERIE: Andréck vum Eric Steichen.

De Kloertext leeft vun elo un am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.