De Kloertext elo am ReplayDe Präis vum Alkohol

Firwat ass den nationalen Alkoholplang net ëmgesat? Wat si sënnvoll Mesuren? Wéi solle mir mam Alkohol ëmgoen? Wou ass d'Grenz tëscht Genoss a Mëssbrauch?

Kloertext: De Präis vum Alkohol (16.05.2018)
Elo Mëttwochs um 20 Auer. D‘Emissioun vum Caroline Mart ronderëm déi Themen, déi jiddereen am Alldag betreffen.

Kee Fest zu Lëtzebuerg ouni Alkohol, mä wat ass d’Grenz tëscht Genoss a Mëssbrauch? Thema am Kloertext an och d’Fro, wou en nationalen Aktiounsplang drun ass, deen vun Experten ausgeschafft gouf, mä bis elo weder publizéiert nach ëmgesat gouf.

Wat d’Grenze betrëfft, esou gëtt et eng nei Grouss-Etüde fir déi iwwer 80 Studien aus 19 verschiddene Länner ausgewäert goufen a wou et am Ganzen ëm 600.000 Mënsche geet, an déi setzt d’Grenz méi niddereg wéi vill offiziell Riichtwäerter: net méi wéi 100 Gramm Alkohol, dat si maximal 5 Glas Wäin, soll een drénken, an dat an der Woch, duerno geet statistesch d’Liewenserwaardung erof. Dat heescht, dass d’Grenz vun 2 Glieser fir eng Fra an dräi fir e Mann den Dag, déi laang genannt goufen, schonn ze héich sinn.

Fir guer kee Risiko anzegoen, misst ee komplett abstinent liewen, seet de Suchttherapeut. Mä dat ass net Zil, Prohibitioun, do war d’Ronn sech eens, et funktionéiert souwisou net. Bei der Fro, wéi staark d’Politik soll agräifen an déi individuell Fräiheet, do war et awer eriwwer mam Konsens, de François Koepp vun der Horesca huet esouguer vu kommunisteschem Regime geschwat, wann alles duerchreglementéiert géif ginn. Et misst een de Leit hir eege Verantwortung loossen an net alles virschreiwen. Fir de Secteur wier et och ëmmer méi schwéier, de Verkaf vun Alkohol wier kloer réckleefeg an de Bistroen a Caféen, dee vum Waasser dergéint geklommen. Kompenséiere géing dat d’Geschäft awer net.

Manner Quantitéit, mä duerfir méi Qualitéit, dofir huet de Privat Wënzer Luc Duhr plaidéiert, Respekt virum Wäin hätt hie schonn a senger Erzéiung mat kritt, mä Wäin wier awer net dat selwecht ewéi zum Beispill schaarfen Alkohol.

Et gëtt beim Alkohol ganz kloer ënnerschiddlech Interessen an och Interessekonflikter. Industrie an Handel, déi dervunner liewen, an op der anerer Säit, d'Gesondheetskäschte fir d’Allgemengheet, net just duerch déi ronn 200 Kränkten, virop Häerz Kreeslaf a Kriibs, déi duerch den iwwerméissegen a regelméissege Konsum entstoe kënnen, mä och nach Accidenter am Stroosseverkéier oder Gewaltdoten. Woubäi et net méiglech ass, dat genee ze chiffréieren.

FOTOGALERIE: Andréck vum Eric Steichen

Firwat ass den nationalen Aktiounsplang net a Kraaft oder Public? Déi parlamentaresch Fro huet d’Deputéiert Martine Mergen der Gesondheetsministesch Lydia Mutsch gestallt. Am Studio krut si als Äntwert awer och bei e pur Nofroen, just déi, dass de Plang nach net politesch vun der Mme Mutsch selwer validéiert wier. An dass si nach préiwe wéilt an net Feeler aus dem Ausland wéilt widderhuelen.

Et ass zwee Joer dru geschafft ginn an zanter annerhallwem Joer ass guer näischt méi geschitt, sot den Dr. Cloos, dee selwer mat dru geschafft huet. Hie konnt net novollzéien, firwat et sou laang dauert a firwat net op d'mannst Deeler schonn ëmgesat goufen, zemools am Curativ kéint ee ganz vill maachen. Fir d’Prise en Charge vun de Patienten ze verbesseren, wou ee sécher keng Interessekonflikter hätt.

E gudden Deel vum Handel gëtt net bei ons am Secteur gemaach, sot de François Koepp, mä an de Supermarchéen an op den Tankstellen. Lëtzebuerg huet jo déi nidderegst Accisen an Europa um Alkohol. Wann een déi géing erhéijen, wier et séier eriwwer mam héichprozentegen Tanktourismus, wier dat denkbar?

Ech soen dat dem Finanzminister” war d’ Äntwert vun der Ministesch op déi Fro, déi awer net kloer sot, ob et fir e Gesondheetsminister méi schwéier ass, sech duerchzesetzen, si sot just, dass beim Jugendschutz all ganz Responsabel wieren an der Regierung.

Dass Jonker apaart geschützt musse ginn, ass kloer. Reng medezinesch wier eng Grenz fir Alkohol kafen an drénken ze däerfe vun 18 oder esouguer 21 Joer méi sënnvoll, ewéi 16, wëll d’Gehir eréischt dann ausgeräift ass an de Schued vill méi héich soss ass.

Ass dat eng Piste oder kënnt zum Beispill e Verbuet vu Publicitéit? Bei kenger Mesure ass d’Ministesch konkret ginn, si wéilt sech op kee Fall elo festleeën a géif sech d’Recht behalen, mat deem Plang ze kommen, wa si der Iwwerzeegung wier, dass e fäerdeg ass. Vill Zäit bleift bis zu de Wale souwisou net méi.

A wat ass vu der CSV z'erwaarden am Fall, wou si u d’Rudder kënnt? Och do war nach net vill Konkretes gewuer ze ginn vun der Martine Mergen, bis op de Verweis op de Walprogramm.

Ganz konkret war dergéint d’Karin Clement, déi zanter 30 Joer dréchen ass a scho ganz jonk ugefaangen huet mat Alkohol a Medikamenter. Wann ee bis krank ass, brauch en Hëllef, soss geet ee futti sot si. Et wier eng Iwwerliewensfro an et misst een nach vill méi aktiv Opklären a Strukture schafen. Si hätt decidéiert, sech ze “outen“ an der Sendung, fir ze weisen, dass een awer och nees eraus kann. Si hätt et gepackt, fir 30 Joer e gutt Liewen ouni Alkohol ze hunn a wéilt aneren esou Hoffnung maachen.

Matgeschwat hunn:

Lydia Mutsch
Gesondheetsministesch

© Eric Steichen

François Koepp
Generalsekretär Horesca

© Eric Steichen

Karin Clement
Zanter 30 Joer dréchen

© Eric Steichen

Dr Martine Mergen
CSV Deputéiert

© Eric Steichen

Luc Duhr
Privatwënzer

© Eric Steichen

Dr Jean-Marc Cloos
Psychiater a Sucht-Therapeut

© Eric Steichen

De Kloertext leeft vun elo un am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.