De Kloertext elo am ReplayMudam: Nei Direktesch! Nei Polemik! Al Debatten?

Firwat gëtt d’Kapell ofgebaut? Wien ass déi nei Direktesch? Wat sinn hir Visiounen? Wéi eng Kulturpolitik brauch Lëtzebuerg?

Kloertext: Thema Mudam, National-Galerie a Kulturpolitik (30.05.2018)
All zweete Mëttwoch um 20 Auer. D'Emissioun vum Caroline Mart ronderëm déi Themen, déi jiddereen am Alldag betreffen.

Wien ass déi nei Direktesch vum Mudam? Firwat huet si ausgerechent als éischt offiziell Decisioun entscheet, fir dem belschen Artist Wim Delvoye seng beléifte Kapell ofzebauen? Ass dat e Skandal oder e politesche Stuerm am Waasserglas? Wéi geet et viru mam Musée? Wat ass seng Geschicht? Wou steiert en hin a wéi ass et allgemeng bestallt ëm déi zäitgenëssesch Konscht an ëm d'Kulturpolitik an onsem Land?

Bis elo war zwar eng grouss Opreegung ronderëm der Suzanne Cotter hir Decisioun, dass d'Kapell misst de pädagogeschen Ateliere Plaz maachen, mä vill Explikatioune gouf et net, ganz glécklech war weder d'Kommunikatioun mam Artist, nach mat der Politik oder der Press.

Elo huet d'Suzanne Cotter, gebierteg Australierin, awer akzeptéiert, e laangen Interview ze ginn. Zanter 2016 ass si dem Mudam scho verbonnen. Als Member vum Comité Scientifique huet si hire Virgänger Enrico Lunghi beroden a sengen Acquisitiounen, ouni awer Land a Verhältnesser esou richteg ze kennen. Wuel eng Explikatioun fir hir Decisioun, awer net déi eenzeg. Wien ass also d'Suzanne Cotter, war si schlecht informéiert a beroden oder huet si ganz bewosst en Zeeche wëlle setzen?

Der neier Cheffin, déi virdrun de Musée fir zäitgenëssesch Konscht zu Porto geleet huet, feelt et weder un Experienz an zolitte Referenzen, nach feelt et hir um feste Wëllen, hir Visiounen duerchzesetzen. An do sollt ee se net ënnerschätzen, si schéngt och gutt negociéiert ze hunn, de Verwaltungsrot stäipt hir de Réck a si hätt esou ze soe fräi Hand fir d'Programmatioun fir déi nächst 5 Joer.

Dat haten och hir Virgänger Uganks gegleeft, mä dunn awer vill Illusioune verluer an och méi fréi wéi geduecht hire Posten, sou wéi iwwerhaapt d'Geschicht vum Musée vun Ufank u vu Polemiken, Krisen, Retarden a Mëssverständnesser gepräägt ass.

Dofir steet de Portrait vun der neier Direktesch och am Kontext vun der mouvementéierter a laanger Geschicht vum Mudam, deen eleng vun der Iddi net manner wéi 17 Joer bis zu senger Ouverture gebraucht huet, wat net just un dem Architekten esou léiwen a rare Steen, deem well berühmte Magny Doré, louch.

Doriwwer an iwwer villes méi hu mer mat dësen Invitéë geschwat:

- Josée Hansen, Journalistin a Konschtkritikerin vum Land, déi zu de wéinege gehéiert, déi wuel all d'Expoen am Mudam gesinn hunn

© Eric Steichen / RTL


- Ben Fayot, fréieren LSAP-President an Deputéierten, dee fir méi Moyene fir déi aktuell a géint zousätzlech Kulturinstituter ass.

© Eric Steichen / RTL


- Marc Baum, Artist op der Bühn an net am Musée a fir déi Lenk kritesche Member vun der Kultur-Kommissioun an der Chamber.

© Eric Steichen / RTL


- Alex Reding vun der privater Konscht-Galerie Nosbaum-Reding, deen och mat Succès d'Art Week lancéiert huet.

© Eric Steichen / RTL


- Raymond Weber, fréieren héije Beamten am Kulturministère, bei der Unesco an am Conseil de l'Europe, dee sech nach ëmmer fir eng besser Kulturpolitik engagéiert.

© Eric Steichen / RTL


Mat hinnen all gouf awer net just iwwert déi nei Direktesch vum Mudam geschwat, mä och iwwert d'Finanze vum Musée a ganz allgemeng vu Kulturinstituter, iwwert d'Iddi, de Mudam zum Beispill och fir privat Zwecker ze notzen an esou zousätzlech Gelder eran ze bréngen, iwwert Fro, wat d'Plaz ass vun nationalen Artisten an deem Musée, deen en internationalen Usproch huet, iwwert d'Iddi vum Kulturminister, fir eng nei National-Galerie ebe just exklusiv fir Lëtzebuerger Artisten an der Ënneschtgaass ze schafen oder och iwwert Präisser um internationale Konscht-Maart, Spekulatioun a Konkurrenz tëscht Muséeën a private Galerien.

An da gëtt am Kloertext och genee 1 Mount virun de Kultur-Assisen e Bilan vun der Kulturpolitik vun dëser Regierung mat gläich 2 verschiddene Kulturministeren an engem Staatssekretär gezunn.

Vill Kritik ...

D'Invitéë ware sech an enger ugereegter Debatt awer eens: Et ass kee Skandal, datt déi nei Directrice d'Decisioun geholl huet, fir d'Kapell net méi auszestellen, mä et ass d'Fräiheet vun der neier Directrice, fir esou eng Decisioun ze huelen. Donieft war et den Appell vun allen Invitéen, datt sech d'Politik aus den Decisioune vun der Mudam-Direktioun soll eraushalen. Et wier sech an de leschte Jore vill ze dacks an ëmmer nees agemëscht ginn.

Donieft gouf sech och d'Fro zum Kultur-Entwécklungs-Programm gestallt. Lëtzebuerg huet nach keen esou e Programm, ma zanter 2008 gëtt doriwwer diskutéiert an elo, 10 Joer méi spéit, soll endlech esou wäit sinn. A ronn engem Mount soll de Programm virgestallt ginn, da wier et awer ze spéit, fir dësen an dëser Legislaturperiod duerchzekréien ...

Och de Bilan vun der Kulturpolitik fält bei eisen Invitéen net positiv aus.

Och d'Propos vum Xavier Bettel als Kulturminister, fir eng nei Galerie fir Lëtzebuerger Artisten ze kreéieren, gouf schaarf kritiséiert. Et sollt net nach en neit Institut kreéiert ginn, mä éischter misst ee kucken, fir deenen Instituter, déi et elo gëtt, déi néideg Moyenen ze ginn, fir dës Aufgab z'iwwerhuelen.

De Kloertext leeft am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.