De Kloertext elo am ReplayWalen 2018: Net-Politiker schwätzen iwwer Politik

An der Talkronn beim Caroline Mart haten e Mëttwoch den Owend d'Wieler d'Wuert: 10 Bierger, vum 18 Joer alen Éischtwieler bis zum 90 Joer ale Stammwieler!

Wat gëtt den Ausschlag beim Vott? Wéi erliewen d'Bierger de Walkampf? Wat sinn hir Erwaardungen un Politik? Fille si sech an hire Suergen eescht geholl?

D'Thema war kloer: Et kënnt den Ament kee laanscht d'Wale 4 Deeg virum 14. Oktober an och dëse Kloertext war eng "Spezialemissioun Walen".

Kloertext: Net-Politiker schwätzen iwwer Politik (10.10.2018)
An der Talkronn mam Caroline Mart, ëmmer mëttwochs ëm 20 Auer op RTL Télé Lëtzebuerg an am Livestream op RTL.lu, haten d'Wieler d'Wuert!


Wann et ee Saz gëtt, deen a kenger Table ronde, a kengem Face-à-face oder Interview déi lescht Woche gefeelt huet, dann ass et: "Et ass de Wieler, deen decidéiert." Mä wat motivéiert seng Decisioun? Wéi beuerteele ganz normal Bierger dëse Walkampf an d'Versprieche vun de Politiker, fille si sech iwwerhaapt ugeschwat, hu se d'Gefill, dass hirer Liewensrealitéit Rechnung gedroe gëtt? Wat sinn hir Erwaardungen a Suergen?

Dat hu mir keng Politiker, mä politesch Interesséiert a Wieler gefrot, vun der Schülerin iwwer Studente bis bei de Pensionär, Staats- a Gemengebeamten, Patron oder Bauer. Et war kee representativen Echantillon, et waren och méi Männer ewéi Fraen - wëll mir kuerzfristeg Ofsoe kruten, ënnert anerem wéinst engem Stierffall - a wëll et egal wéi schwiereg ass, sech virun eng Kamera ze setzen an och iwwer seng perséinlech Situatioun ze schwätzen.

De Resumé vum Kloertext mat Net-Politiker (11.10.2018)
An der Talkronn beim Caroline Mart haten e Mëttwoch den Owend d'Wieler d'Wuert: 10 Bierger, vum 18 Joer alen Éischtwieler bis zum 90 Joer ale Stammwieler!

Mat dësen Invitéen diskutéiere mir

Yasmine Philips
schafft beim Staat / Elengerzéierin / 1 Kand

David Angel
schafft beim OGBL / Lëtzebuerger Frontalier / 1 Kand

Jean Weirig  
Fréipensionéierten / Privatbeamten / 2 Kanner

Mathis Godefroid
studéiert Geschicht / Tresorier CGJL 

Alex Carvalho
studéiert Kino / huet e Blog

Jean Heuschling 
schafft fir d'Gemeng Lëtzebuerg / Elengerzéier / 2 Kanner

Jacques Constantin 
Patron vun engem Schräinereibetrib / 1 Kand

Pia Linden
Schülerin op 1ère / war am Jugendparlament aktiv

Claude Loutsch
Bauer a 4. Generatioun / 3 Kanner / 1. Schäffe Biekerech

De Resumé vun der Emissioun vum Caroline Mart
Politesch, mä net parteipolitesch war de Kloertext 4 Deeg virum 14. Oktober. Natierlech huet sech alles ëm d'Wale gedréit, mä an enger Ronn fir eemol ganz ouni Kandidaten! Esou vill Mol ass gesot ginn, dass de Wieler decidéiert, dass mir um Enn vun der Campagne dunn och eng Kéier nëmme Wieler wollten d'Wuert ginn. Et war eng Ronn, an där zwar déiselwecht Themen ugeschwat goufen wéi an de klasseschen Table-rondë mat de Kandidaten, mä d'Invitéë konnten net just aus hirer eegener Experienz zielen, mä sinn hunn och erfrëschend anescht geschwat - genee esou, wéi si et bei de Politiker dacks vermëssen: riicht eraus!

10 Bierger, 10 Wieler, vum 18 Joer alen Éischtwieler bis zum 90 Joer ale Stammwieler, souzen am Studio, fir de Walkampf aus hirer Siicht ze analyséieren. Trotz de ganz ënnerschiddleche Situatioune ware se sech awer all eens, dass dëse Walkampf opfalend langweileg war, et zu wéinege Konfrontatioune koum an dass et och ëmmer méi schwéier wier, iwwerhaapt nach - apaart bei de groussen Parteien - och an de Programmer deen ee vun deem aneren ausenaner ze halen! Dass een den Androck hätt, et géing just nach dorëms goen, kengem op d'Féiss ze trëppelen, fir sech all Optiounen opzehalen.

D'Invitéen hu stellvertriedend fir vill anerer d'Wuert ergraff, wëll si e "Profil" hunn, iwwer deen d'Politiker schwätzen a fir dee se och Léisunge proposéieren. Gemeinsam hunn déi 10 just, dass se alleguerte politesch interesséiert an och gesellschaftlech engagéiert sinn.

3 Jonker - d'Pia Linden op 1ère, de Mathis Godfroid an den Alex Carvalho op der Uni respektiv engem BTS - alleguer hu si sech schonn oder sinn nach engagéiert am Jugend-Parlament, der Jugend-Konferenz oder de Scouten ... Dann den eelsten an der Ronn, de Mario Igniti, deen op der Schmelz geschafft huet, e fréipensionéierte Privatbeamten, de Jean Weirig, dee selwer nach 2 Bouwen huet, déi studéieren, zwee Elengerzéier, d'Yasmin Philips, déi haut fir de Staat schafft a fréier en eegene Betrib geleet huet, de Jean Heuschling, deen op der Gemeng schafft a sech asetzt fir d'Rechter vun de Monoparentallen, dann ee jonke Lëtzebuerger Frontalier, den David Angel, deen zu Metz wunnt an ee Joer laang hallef geschafft huet, dank Congé parental, op där anerer Säit zwee Männer, de Jacques Constantin an de Claude Loutsch, déi och Pappe si vu nach klenge Kanner, deen Éischte Patron vun engem Schräinerbetrib, den Zweete Schwéngsbauer.

De Congé parental war ee gutt Beispill an der Diskussioun, dass eng politesch Mesure ganz aner Konsequenzen hu ka jee no Liewenssituatioun: fir den David Angel dat Bescht, wat dës Regierung gemaach huet, de Jacques Constantin kann zwar novollzéien, dass et privat eng gutt Saach ass, mä als klenge Patron mat 15 Mann am Betrib wier et einfach net ëmzesetzen, iwwerdeems de Claude Loutsch esouguer vun de Méiglechkeete vum Congé parental profitéiert huet, mä d'Jongléiere mat 3 Kanner als Koppel, déi zu zwee schafft, wier hinnen nëmme méiglech dank de Grousselteren, an als Bauer géing hien och 3 Mol méi wéi säi Papp an der Zäit schaffen, mat manner Liewensqualitéit.

Aner Themen, déi deels kontrovers diskutéiert goufen, waren: d'Educatioun, d'Beruffsorientatioun a politesch Bildung an de Schoulen, de Gruef tëscht Fonction publique a Privatsecteur, de Logement, Steiergerechtegkeet, den Aarmutsrisiko an d'Ongläichheeten am Land an och d'Roll vun der Lëtzebuerger Sprooch an onser Identitéit a wéi déi am Walkampf thematiséiert ginn.

Bléift ofzewaarden wéi anescht den Tounfall an der leschter grousser Ronn dëse Freiden, 12. Oktober nees wäert sinn, wou d'Spëtzekandidate vun 8 Parteien – dorënner och de Xavier Bettel, Claude Wiseler, Etienne Schneider a François Bausch - openeentreffen – an ob se do dann dem Wonsch vun den Invitéen am Kloertext gerecht ginn an et dach zu enger richteger Ausenanersetzung kënnt ...

De Kloertext leeft am Prinzip all zweete Mëttwoch um 20 Auer op RTL Télé Lëtzebuerg - direkt nom Journal. Op RTL.lu an iwwert d'App streame mir de ganze Programm vun RTL Télé Lëtzebuerg. Dir kënnt de Kloertext also och am Livestream suivéieren an dono am Replay nach eemol kucken oder consultéieren. (Et kann awer e bëssen daueren, bis d'Emissioun no der Diffusioun komplett fir den Internet konvertéiert ass. Merci fir Äert Versteesdemech.)

Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.