Mmmh! WanterkichenEpisod 5: Schwéngsmignon vun der Marque Nationale

Op der Sich nom perfekte Plat fir d'Feierdeeg ass de Ben Péporté op Besuch beim Claude Mondloch aus dem Betty Buvette

Wanterkichen - Episod 5 - Schwéngsmignon (22.12.2017)
Den Ben Péporté sicht nom perfekten Plat fir d’Feierdeeg. An der läschter Episod kënnt d’Propose vum Kach Claude Mondloch.

Schwéngsmignon mat Kachkéis, grénge Bounen, rouden Rommelen an enger Béierzooss – dat ass den perfekten Plat fir d’Feierdeeg den de Kach Claude Mondloch dem Ben Péporté proposéiert. Regional Produiten kombinéiert mam Schwéngefleesch vun der Marque Nationale.

De perfekte Plat fir d'Feierdeeg mat Schwéngefleesch vun der Marque National - dono sicht de Ben Péporté dëst Joer. Dëse Freiden weist de Claude Mondloch him ee vun sengen Lieblingsrezepter.

Schwéngsmignon vun der Marque Nationale

(vum Claude Mondloch aus dem Betty Buvette)

Schwéngsmignon mat Kachkéis begleet vun Gromperepüree, grénge Bounen, roude Rommelen an enger Béierzooss


Ingredienten


Fir d’Fleesch:
400 g Schwéngsmignon
100 g Kachkéis (an der Strull fir opzekachen)
Moschter
1 Ee
Miel
Panéiermiel

Fir den Gromperepüree:
400 g mielzeg Gromperen
150 ml Mëllech
70 g Botter
Muskot

Fir déi gréng Bounen:
160 g gréng Bounen
20 g Botter
Bounekraitchen

Fir d’rout Rommelen:
2 gekachten rout Rommelen
2 Zweiger Thymian

Fir d’Zooss:
250 ml brongen Fong
125 ml donkelen Béier
3 Iessläffele Quetschekraut

 

Rezept

De Schwéngsmignon vun alle Säiten ubroden, erëm ofkille loossen an a 1,5 cm déck Tranchë schneiden. D’Kachkéisstrull an 1 cm déck Tranche schneiden. Jeweils eng Säit Fleesch mat Moschter besträichen an dann eng Tranche Kachkéis tëscht zwou Tranche Fleesch leeën. Dës „Sandwichen“ panéieren. Dofir fir d’éischt am Miel, dann am Ee an zum Schluss am Panéiermiel dréinen. An dann an der Friteuse kuerz frittéiere bis se brong sinn. Op e bësse Kichepabeier ofdréchnen. Wann d’Bäilagen all prett sinn d’Fleesch nach fir 5 Minutte bei 200°C am Schäffchen, zesumme mat de roude Rommelen, wiermen.

Grompere schielen an am kale Waasser opsetzen a kache bis se mëll sinn. D’Waasser ofschëdden. D’Grompere mat der Mëllech an dem Botter mëschen an zu Püree stamen. Mat Salz, Peffer a Muskot ofschmaachen.

Fir d’Zooss de bronge Fong zesumme mam Béier an eng Kasserolle opkachen an zu 1/3 reduzéiere loossen. Dann d’Quetschekraut an d’Zooss ginn a mat Salz a Peffer ofschmaachen.

Déi gréng Boune während 3 Minutten am waarme Waasser blanchéieren. Duerno am kale Waasser kuerz ofschrécken. An enger Kasserolle déi gréng Boune mat Botter a Bounekraitche mëschen a 5 Minutte kache loossen. Mat Salz a Peffer ofschmaachen.

Déi gekachten a geschielte rout Rommelen a féier schneiden. An enger Bakform mat Ueleg, Thymian, Salz a Peffer mëschen a während 5 Minutte bei 200°C am Schäffche wiermen.


Gudden Appetit!